Is baar bhi wahi hua. 'Mera Naam Joker' ka Vigyan Bhavan mein premier. Wahi mahol. Hamen usi block mein bathaya gaya tha , jahan 'Tisari kasam' ke liye  Rastrapati ka puraskar Shailendra ko diya gaya tha. Bhabhiji (Smt. Shailendra) ne puraskar grahan kiya tha. Samaroh ke baad sari lambi lambi gadiyan furrhh... karti chali gayi thi aur Bhabhiji aur hum log paidal apne hotal ki taraf ravana hue the.

'Jokar' ka premier hum sab ke liye ek ghatna thi, sukhad ghatana. Tab bhi Shailendra ki yaad kachot kar aati thi. Raj saahab ne bhashad dete waqt kaha bhi tha - ' Us stumbh ko nahi bhool sakta , is imarat ko sumbhale rakne mein jo bahut mahtvapurna tha...'

                              Shailendra ke saath kaam karne ke din sunhare the...    Jane kahan gaye vo din ? 

Din to kai the sunahre ! Kabhi khoobsurat geet khoobsurat dhunon mein bandhen jate the aur mujhe unhen gane ka moaqa milta tha to mithi si kasak  gate waqt bhitar kahin mahsoos hoti thi. ' Dil jalta hai to jalne de ' se lekar ' Jane kahan gayen vo din ' gane taq ka arsa bahut lamba hai. Lamba to hai , par kya agrgami bhi hai ? Kya main age badhta hua , upar chadta hua hi yahan taq aaya hoon , ya ki...

    Apne doston ko main nirasawadi sa lagta hoon. Kabhi kabhi kahta hoon ki film ke sangeet ka star vah nahin raha , jo hona chahiye tha. Takneek albatta , bahut badhi hai. Par wah jo moolbhoot baat thi. Bhavana , kalpana chad, koi halki si kumpkapi ya lahar ya tees , jiske gird geet aur dhoon bune jaate the, jo kitne hi takneeki mulamoon ke chadne par bhi mun ko aandolit kar deti thi, ab wah moolbhoot baat hi goya gayab hai ! Takneek phir kise sawarne ke liye hai ? Haan ab bhi koi achha geet , koi acchi dhun sunayi de to jaati hai , magar bas kabhi kabhi !

        Us moolbhoot baat ke lye hi to main Saigal ka bhakta hoon. Us jamane mein recording kya thi ? Kitne kushal karigar the ? kitne Nisddat sageetagya the ? Kitne vadya yantra the aur kitne the unke vadak ? Saigal harmoniyam lekar baith jate the , ekaadh  tabla , ekaadh sarangi ya sitar , agar mil gaya. Aur tab ve gaate the , ve geet jo ab bhi jinda hain aur rahenge. Kya hota , agar aaj Saigal hote ! 

Nahin , achha hua , ve nahin hain. Aaj Saigal hote , to kuch na hote . Apne bhitar sanjon kar rakha hua dard  gane ki gunjayish aaj nahi hai , ve sukun ke din nahin hai ab. Ek bhidd bhaddaka hai , roun hai , teji hai , tufan aur sailab hai. Sunne wale log badle hain , aur sunane wale bhi badal gaye hain. Ya sayad sunanne wale badal gayen hain , isliye sunne wale badeal gaye hain. Ab ganno ki aawaaj vadyon ke tej suroon ki basakhinyon per chalti hai. Kiska dosh hai ye ? Bade sangeet karon ka bade film nirmataon ka , filmon mein aayi shaandaar taraaki ka ? Saigal ke jamane mein gini chuni filmme aati thi. Gine chune gane aate the. Sunne wale kan bichaye baithe rahte the aur naya geet unki chakori pyas ke liye oos ki boond hota tha. Ab to geeton ka samundar lahraya hua hai. Samundar mein meethi dhaar bhi khari  hi rahti hai. Is sailab mein har boond apne astivav ke liye lad rahi hai. har geet pukar kar kahna chahta hai - Main bhi hoon , Mujhe suno. Tab pukarane mein jo jyada jor se pukarega , suna jayega . Dheeme aawaj kaise chalegi ? Aawaj tej se tejtar hoti hai. Radio , hotal , record , prachaar sab par kabu kiya jata hai , taki yah boond us boond ke upar sawai ho rahe.

                  Kaha gaye vo din ? Ab kya ' Dil jalta hai ' phir nahin banega ? Mujhe nahin lagta , banega. Ab to videshi record haanth me lekar nirmata sangeet kaar ke paas jata hai. computaron ki tarah geetkaar usme subbd bharta hai , sangeetkaar , dhoon , gayak , swar . Kahin kisi prayog ki gunjayish nahi. Prayog kar baithe ki gaye. Phir koun use uthane wala hai ? Bade loog prayog kyon kare ? Unhen sailab par kabu karna aata hai , we bina prayog kiya khush hain. Choten is sailab ki lagam tham nahi sakte. Agar prayog karke alag dikhna chaheten hain , tab unhen koi karne nahi deta. Film ke vayasaay ka haal nirala hai. Choti rakmon se badi badi rakmon tak film wale aa to gayen hain , par dil ke doure bardasht kar sakte hain , choti rakmon ki filmon mein haath nahi daal sakte. Jaise bada juaari chote khel ko hikarat ki najar se dekhta hai. Koi laakh pukar kar kahe ki are bhai , ek najar yahan daal kar to dekho. Ye film choti jaroor hai , magar ishme kuchh hai ! Kahne ko bhi kuchh hai , dekhane ko soundarya bhi hai , sunne ko mithash bhi hai. Koi nahi dekhega. Dhandhe mein in choti chalon ki koi pooch nahi hai , yah bade ka dhandha hai , jeet chahiye to badi , haar bhi badi hi chahiye. Choti haar harna kisi ko manjoor nahin. Kabhi hum kahte the , Film vayasayik kala hai , par kala hai jaroor , balki kala pahle hai , vaysaay baad mein hain. Aaj mujhe lagta hai. Hum jab bhi aisa kahte the , jhooth bolte the. Film vaysaay pahle hai , vayssay hi baad mein hai.

          Ye saari bandishe bhi kisi kaam ki nahin hain. Bade kalakaar 6 se jyada phimen na le , sangeetkaar 6 se jyada filmen na le. Aise  upchaar itne bade roog ko dhik karne ke liye apang hi sabit honge : Kya  hoga isse ? Kya bade nirmata chote kalakaaron aur chote sangeetkaroon ko lekar filmen bana lenge ? Asumbhav. We ab bhi samarth hain ki badon ko aur badi keemat dekar le aayen. Chote nirmata tod-jod kar kuch bade kuch chote log ikatthe kar ke kaam chala lete the , we gaye kaam se. Aur tajage ki , nayepan ki , prayog ki kuch jara bahut gunjayish thi  bhi in choton ke saath , wah bhi doob gayi. Kuch nahi hoga. Ve din ab nahin lotenge. Bahut peeche choot gaye ve din. 

Madhuri , 8 January 1971